متجري · للي بيبيع أونلاين · من بأمرك

سأل عن السعر الساعة 11 بالليل.
وطلبه تسجّل.

متجري بيحط مساعدة ذكية على نفس رقم واتساب متجرك. بتحكي الأسعار والمواصفات من قائمتك إنت، بتبعت صور المنتجات وطريقة الدفع، وبتسجّل الطلب. وما في شي بيمشي قبل ما تأكّده إنت بكبسة.

25 دولار بالشهر لحد 31 كانون الأول 2026. وأول 14 يوم مجاناً.

المساعدة

بتبيع من دفترك إنت. حرف بحرف.

بترد على زباينك على نفس رقم متجرك، من اللي إنت كتبته: منتجاتك بأسعارها ومواصفاتها، التوصيل والشحن، وطرق الدفع. بتشوف كل كلمة، وبتتدخّل وقت ما بدك. واسأل مجرّب ولا تسأل حكيم: جرّبها بنفسك.

  • بترد ليل نهار

    ما في زبون بيضل ناطر للصبح ليعرف السعر ويروح يشتري من غيرك. وبتفهم الفويسات كمان.

  • الأسعار والمواصفات متل ما كتبتها

    ما بتخترع ماركة ولا لون ولا سعة.

  • بتبعت صور المنتج

    الزبون بيطلب صورته، وهي بتبعت الصور اللي حطيتها إنت.

  • بتبعت طريقة الدفع

    الطريقة اللي اختارها الزبون، متل ما كتبتها إنت، مع صورة الـQR.

  • بتسجّل الطلب، وإنت بتأكّد

    توصيل أو شحن أو استلام. وبيضل ناطر كبستك.

  • ما بتعطي حسم ولا بتفاصل

    المفاصلة والترجيع والكفالة وطلبات الجملة بتوصلك إنت.

  • ما بتقول «وصل الدفع» أبداً

    بتطلب صورة إشعار التحويل. وإنت اللي بتأكّد.

  • بتستلم إنت بأي وقت

    بتكتب إنت، من التطبيق أو من تلفونك، وهي بتسكت مع هالزبون.

متجر نورلين، المساعدة الذكية، بترد هلّق

مرحبا، بأديش الباور بانك 20 ألف؟ وبتشحنوا؟

أهلين. الباور بانك 20,000 mAh مع شاشة سعره 2,900 للقطعة، وشحنه سريع 22.5W. وإيه منشحن، وأجرة الشحن 250. بتحب ابعتلك صورته؟

تمام بدي واحد، باسم سامر، وبستلمه من مكتب الشحن

تمام سامر، سجّلتلك طلب مبدئي: باور بانك × 1، مع الشحن. المجموع 3,150. المتجر بيأكّدلك هون قبل ما يشحن.

الطلب صار بالطلبات، وبدّه تأكيدك.

احكي مع لين بنفسك

  • «كيف بدفع؟» الجواب جوابك إنت، حرف بحرف.

    بتبعت الطريقة اللي كتبتها مع صورة الـQR، وبتطلب صورة إشعار التحويل. وما بتكتب رقم حساب من عندها.

  • مفاصلة أو شكوى؟ بتوصلك إنت.

    بتعتذر بلطف وما بتوعد بشي، وبتعلّم المحادثة «بدها رد منك». بيوصلك تنبيه، وبكبسة «استلم أنا» بتصير عندك.

الطلبات

كل شي بوقته حلو.

المساعدة بتسجّل الطلب، وبيضل ناطرك. بتأكّد بكبسة، والرسائل بتطلع لحالها، كل وحدة مرة وحدة، والزبون بيعرف وين صار طلبه. بعد شهر بتوصله منك رسالة أخيرة، وبعدها بتوقف.

  1. زبون جديد01

    ترحيب

    مرحبا سامر، معك متجر نور. إذا حابب تطلب شي أو عندك أي سؤال، ابعتلنا هون.

    بتنبعت مرة وحدة. عدّلها متل ما بدك.

  2. الطلب تسجّل02

    ناطر تأكيدك

    تمام سامر، سجّلتلك طلب مبدئي: باور بانك × 1، مع الشحن. المجموع 3,150. المتجر بيأكّدلك هون قبل ما يشحن.

    بيضل بـ«بدها تأكيد» لحتى تكبس.

  3. لما تأكّد03

    تأكيد

    مرحبا سامر، معك متجر نور. تأكّد طلبك رقم 42: باور بانك 20,000 mAh × 1. المجموع 3,150. إذا بدك تعدّل شي ردّ علينا هون.

    بكبسة «تأكيد» من الطلبات.

  4. لما ينشحن04

    عالطريق

    مرحبا سامر، معك متجر نور. طلبك رقم 42 طلع مع شركة الشحن. رقم الإيصال 7781.

    مع ملاحظة الشحن اللي بتكتبها إنت.

  5. بعد شهر05

    إن شاء الله عجبك

    مرحبا سامر، معك متجر نور. إن شاء الله عجبك طلبك. إذا احتجت شي تاني ابعتلنا ومنجهّزلك ياه.

    مرة وحدة، وبعدها بتوقف. فيك تغيّر المدة أو تطفيها.

ولا رسالة بتطلع قبل ما تأكّد إنت. وفيك تعدّل أي كلمة.

النظام

متجرك كله بشاشة وحدة.

منتجاتك وطلباتك وطرق الدفع وكل محادثات الواتساب، بمكان واحد، على الكمبيوتر أو على تلفونك. والتطبيق خفيف ومعمول للنت البطيء.

  1. 01

    منتجاتك بأقسامك إنت

    بتسمّي الأقسام وبترتّبها متل ما بدك. وكل منتج بسعره ومواصفاته وكفالته إذا في، وصورتين، ومتوفر أو لأ.

  2. 02

    مقاسات وألوان وأسعار العروض

    علّم المقاس أو اللون اللي خلص، وما بينباع. وحط السعر قبل الحسم، وهي بتقول «كان وصار».

  3. 03

    تحديث الأسعار بشاشة وحدة

    بتغيّر الأسعار وبتطفّي اللي خلص، وبكبسة بينحفظ كله. واللي خلص ما بينحكى سعره ولا بيتسجّل عليه طلب.

  4. 04

    طرق الدفع، بتكتبها مرة وحدة

    الاسم، و«كيف تدفع»، وصورة الـQR إذا عندك. وهاد اللي بيوصل للزبون.

  5. 05

    توصيل، شحن، أو استلام

    مناطق توصيل بأجرتها وأقل طلب، وشحن بأجرة أو ملاحظة، أو استلام من المحل.

  6. 06

    كل المحادثات بصندوق واحد

    كل الواتساب، وفوقه اللي بدها رد منك: مفاصلة، كفالة، جملة، وصور إشعارات الدفع.

  7. 07

    حسابات لموظفينك

    كل موظف بحسابه، بيشتغل بالطلبات والمحادثات، وأرقام الزباين مخفية عنه إذا بدك.

  8. 08

    أكتر من رقم

    ضيف رقم واتساب تاني، وإذا وقع واحد، التاني بيكمّل عنه.

الفاتورة

سعر واحد. وشرط بالحقل ولا خناقة عالبيدر.

متجر صغير أو كبير، نفس السعر، والمساعدة الذكية معه.

  • سعر الإطلاق ثابت لحد 31 كانون الأول 2026، وبعدها 50 دولار بالشهر.
  • أول 14 يوم مجاناً، على حسابك الحقيقي ومع زباينك الحقيقيين.
  • كل رقم واتساب إضافي 10 دولار بالشهر، ومنضيفه نحنا.
  • الدفع شهري، ومنرتّبه مباشرة مع فريق بأمرك.

احكي مع شام لتبلّش

متجري، للمتاجر الأونلاين

طلب رقم 001اليوم

نظام المتجر + المساعدة الذكية

  1. منتجات، أقسام، أسعار، صور
  2. مساعدة ذكية، ليل نهار
  3. طلبات: توصيل، شحن، استلام
  4. طرق الدفع مع الـQR، وصندوق واحد
  5. يوم مجاناً، على حسابك الحقيقي
  6. «راجعنا بكرا»
بالشهر
$25
لحد
31/12/2026
بعدها
$50 بالشهر
رقم إضافي
$10 بالشهر

شكراً. شرّفونا مرة تانية.

المتجر التجريبي مفتوح ومجاني. جرّبه أول.

أجوبة واضحة

أول شي بيسألوه أصحاب المتاجر. والصراحة راحة.

لمين متجري؟

لأي حدا بيبيع منتجات أونلاين وبياخد طلباته على الواتساب: ألبسة، أحذية، عطور، مكياج، إلكترونيات وإكسسوارات موبايل، هدايا، أدوات منزلية. عندك محل، أو بتبيع أونلاين بس.

لازم جيب حدا يركّبلي ياه؟

لأ. شام بتبعتلك رابط وإنت بتفتح حسابك بنفسك بدقيقتين، وبتربط الواتساب من تلفونك بمسح QR أو بكود ربط. منتجاتك وأسعارك بتكتبهن بالتطبيق، أو بتبعت القائمة لشام على الواتساب: بتقرالك ياها، وبتدخّلها بعد ما تقول «إي». وإذا علقت بشي، شام أو الفريق بيمشوا معك خطوة بخطوة.

بتحكي أسعار من عندها لتمشّي البيعة؟

لأ. بتحكي بس الأسعار والمواصفات اللي إنت كتبتها، وما بتحكي سعر منتج خلص ولا بتسجّل عليه طلب. ما بتعطي حسم وما بتفاصل: المفاصلة والترجيع والكفالة وطلبات الجملة بتعلّمها «بدها رد منك» وبتوصلك إنت.

كيف بيدفعلي الزبون؟

بطرق الدفع اللي إنت بتكتبها، أي طريقة بتقبلها. المساعدة بتبعتله الطريقة اللي اختارها متل ما كتبتها، مع صورة الـQR، وبتطلب منه صورة إشعار التحويل. ولما توصل، المحادثة بتوصلك إنت. والتأكيد إنه الدفع وصل دايماً إلك، هي ما بتقولها أبداً.

بتمشي مع الشحن؟

إذا إنت بتشحن، إيه. بتحدد أجرة الشحن، أو ملاحظة متل «الأجرة حسب شركة الشحن»، والمساعدة بتاخد العنوان واسم المستلم. وما بتخترع أجرة ما كتبتها. ولما تشحن الطلب، بتوصل الزبون رسالة فيها ملاحظة الشحن تبعك.

بقدر رد أنا بأي وقت؟

أكيد. بتستلم أي محادثة من التطبيق أو من تلفونك مباشرة، والمساعدة بتسكت مع هالزبون. وبترجّعلها ياها بكبسة.

كيف ببلّش؟

احكي مع شام، وهي بتبعتلك رابط بتفتح فيه حسابك بدقيقتين. بعدها بتربط رقم المتجر من تلفونك، وبتضيف منتجاتك وأسعارك وطرق الدفع والتوصيل. وقبل كل هاد، فيك تتفرّج على المتجر التجريبي وتشوف كيف بيشتغل كل شي.

كيف بدفع اشتراكي؟

أول 14 يوم مجاناً على حسابك الحقيقي. بعدها 25 دولار بالشهر لحد 31 كانون الأول 2026، وبعدها 50 دولار، والمساعدة الذكية معه، و10 دولار لكل رقم إضافي. الدفع شهري، ومنرتّبه مباشرة مع الفريق.

بيشتغل إذا النت ضعيف؟

إيه. التطبيق خفيف، والرسائل بتطلع من عنا كجهاز مرتبط بواتساب، فبتضل ماشية حتى لو تلفونك مطفي. بس خلّي تلفونك يتصل بالنت مرة كل كم يوم، لأن واتساب بيفصل الأجهزة المرتبطة إذا غاب التلفون فترة طويلة.

اطلب حسابك

اسأل شام. اللي بيسأل ما بيتوه.

شام هي المساعدة الذكية تبع بأمرك، ومثال حي عن المساعدة اللي رح ترد على زباينك. اسألها أي شي عن متجري. وإذا حبيت تبلّش، بتبعتلك رابط بتفتح فيه حسابك بدقيقتين. وابعتلها قائمة منتجاتك وأسعارك، وهي بتدخّلها عنك.

الفريق اللي ورا متجري

  • قصيالمؤسس
  • لؤيالشريك المؤسس، النمو
  • Blazeمهندس الأنظمة، ذكاء اصطناعي
  • شامالمبيعات والدعم، ذكاء اصطناعي

شامعلى الواتساب, +971 58 544 1315

مرحبا، ببيع عطور وإكسسوارات أونلاين، كيف بيفيدني هاد؟

أهلين. متجري بيرتّبلك منتجاتك وأسعارك وطلباتك، وفي مساعدة ذكية بترد على زباينك حتى بالليل: بتحكي الأسعار، بتبعت الصور وطريقة الدفع، وبتسجّل الطلب وإنت بتأكّد. شو اسمك، وشو اسم المتجر؟

بأمرك. واعتبرها صارت.